خدا کے بعد جن کا مرتبہ ہر اک سے اعظم ہے
محمد حسین مشاہد رضوی
خدا کے بعد جن کا مرتبہ ہر اک سے اعظم ہے
عطاے کبریا سے ان کی مدحت لب پہ پیہم ہے
یتیموں بے کسوں کے سیدِ ابرار یاور ہیں
انھیں کی غمگساری دہر میں سب سے مکرم ہے
وہ جن پر جان کے دشمن بھی جاں سے ہوگئے قرباں
وہی ہیں جن کا خُلقِ پاک عالی ہے، معظم ہے
مصائب میں پکار ان کو مٹیں گے سب الم تیرے
ترے غم خوار جب ہیں مصطفیٰ تو تجھ کو کیا غم ہے
عطا فرمائیں گے اذنِ مدینہ دیکھنا اک دن
مری امید لطفِ سیدِ ابرار سے ضم ہے
بروزِ حشر بخشش عام ہوگی جانِ رحمت کی
دل مضطر میں کیوں کر تیرے بے تابی کا عالم ہے
مشاہد تجھ سے کب ممکن ہے مدحت پیارے آقا کی
ثنا خواں ان کا جب قرآن میں خود ربِ اکرم ہے
عرض نمودہ :
محمد حسین مشاہد رضوی
27 جنوری 2022ء بروز جمعرات
