قبلۂ عارفاں خواجۂ خواجگاں
از: طفیل احمد مصباحی
قبلۂ عارفاں خواجۂ خواجگاں
نازشِ چشتیاں خواجۂ خواجگاں
علم کے گلْسِتاں خواجۂ خواجگاں
فضل کے بوستاں خواجۂ خواجگاں
زہد کے رازداں خواجۂ خواجگاں
علم کے دُر فشاں خواجۂ خواجگاں
جائے امن و اماں خواجۂ خواجگاں
آپ کا آستاں خواجۂ خواجگاں
ٔ
قبلۂ سالکاں ، خواجۂ خواجگاں
قصرِ عظمت نشاں خواجۂ خواجگاں
دینِ حق کی اذاں خواجۂ خواجگاں
شاہِ ہندستاں خواجۂ خواجگاں
ہند کے سارے اقطاب ہیں بالیقیں
آپ کے مدح خواں خواجۂ خواجگاں
آپ کا ، آپ کا ، بالیقیں آپ کا
در ہے رشکِ جناں خواجۂ خواجگاں
نرغہء کفر میں ، بالیقیں آپ تھے
دین کے پاسباں خواجۂ خواجگاں
آپ کے در پہ جاتے ہیں لینے کو بھیک
وقت کے حکمراں خواجۂ خواجگاں
چوم لوں شوق سے ، بخت سے گر ملے
آپ کا پائداں خواجۂ خواجگاں
آپ کا ذکر کرتے بصد احترام
یہ زمیں آسماں خواجۂ خواجگاں
تیرے عشّاق کرتے نہیں ہیں کبھی
فکرِ سود و زیاں خواجۂ خواجگاں
بھر دیں دامن مرادوں کے پھولوں سے اب
مونسِ بیکساں خواجۂ خواجگاں
بحرِ جود و سخا موجزن آپ کا
از کراں تا کراں خواجۂ خواجگاں
دور کر دیجیے زندگی سے مری
غم کی پرچھائیاں خواجۂ خواجگاں
ان کا رخ موڑیے ، پھر سے چلنے لگیں
کفر کی آ ندھیاں خواجۂ خواجگاں
آپ کے در پہ ہوتا نہیں ہے کبھی
مدّعا رائگاں خواجۂ خواجگاں
خشک ہے ، جامِ رحمت سے بھر دیجیے
میرے دل کا کنواں خواجۂ خواجگاں
سب کو محسوس ہوتا ہے اجمیر میں
شب میں دن کا سماں خواجۂ خواجگاں
چھوڑ کر آستاں ،جائے احمدؔ کہاں ؟
اے مرے مہْرباں خواجۂ خواجگاں
